பாசத்தினால் வாழ்நாள் முழுவதும் அடிமையான வரலாறு

நபிகள் நாயகம் ﷺ அவர்களின் உயரிய நற்பண்பும், ஒரு சஹாபி நபி ﷺ அவர்கள் மீது கொண்ட பாசமும். (தேன் சுவைக்கும் வரலாற்றுக் குறிப்பு)

செல்வந்தர், ஏழை, எஜமான், அடிமை என்ற வேறுபாடின்றி அனைவரிடமும் அன்பும், சமத்துவமும் கொண்ட இயல்புடையவர்களாக நபிகள் நாயகம் ﷺ அவர்கள் வாழ்ந்தார்கள்.

இச் சமத்துவ குணத்தினால் நபிகள் நாயகம் ﷺ அவர்கள் உலகிற்கே வழிகாட்டியாகத் திகழ்ந்தார்கள்.

யுத்தகாலங்களில் சிறைக் கைதிகளாகப் பிடிபட்டவர்களை அடிமைகளாக்கி, அவர்களை பண்ட மாற்றுப் பொருள்களைப் போன்று விற்பனை செய்வது அந்தக் காலத்தில் அரபு நாட்டில் வழக்கமாயிருந்தது.

ஒரு சமயம், சிறை பிடிக்கப்பட்டு அடிமையாக்கப்பட்ட ஜைத் இப்னு ஹாரிஸா (ரழி) அவர்களை விற்பனை செய்வதற்காகச் சந்தைக்குக் கொண்டு வரப்பட்டார். அப்போது அவரை ஹக்கீம் இப்னு ஹஸ்லாம் என்பவர் விலைக்கு வாங்கி தனது தந்தையின் சகோதரி கதீஜா ரலியல்லாஹு அன்ஹா அவர்களுக்கு அன்பளிப்புச் செய்தார்கள்.

பின்னர் கதீஜா ரலியல்லாஹு அன்ஹா அவர்களோ அந்த அடிமையை நபிகள் நாயகம் ﷺ அவர்களுக்கு அன்பளித்தார்கள்.

நபிகள் நாயகம் ﷺ அவர்கள் உடனே ஜைத் இப்னு ஹாரிஸா (ரழி) அவர்களை அடிமையிலிருந்து விடு வித்து, "நீங்கள் இங்கே இருக்க விரும்பினால் இருக்கலாம், அல்லது உங்கள் விருப்பம் போல் சுதந்திரமாக எங்கே வேண்டுமானாலும் போகலாம்” என்று கூறினார்கள்.

பெருமானார் ﷺ அவர்களுடைய உயர் பண்பினால் உள்ளம் நெகிழ்ந்த ஜைத் இப்னு ஹாரிஸா (ரழி) அவர்கள் நபிகள் நாயகம் ﷺ அவர்களை விட்டுப் பிரிய மனம் இல்லாதவராய் அவர்களின் காலடியிலே நிரந்தரமாக தங்கி விட்டார்.

ஜைத்  (ரழி) அவர்கள் அடிமையான செய்தியை அறிந்த அவருடைய தந்தை ஹாரிஸா அவர்கள் தனது மகனை விடுவித்து அழைத்துச் செல்வதற்காக தேவையான செல்வங்களை எடுத்துக் கொண்டு வந்தார்.

ஹாரிஸா அவர்கள் மக்கா நகர் வந்ததும் தனது மகன் விடுதலை செய்யப்பட்ட தகவலறிந்தார். பின்பு மகனை தம்மோடு வீட்டுக்கு திரும்புமாறு அழைத்தார்.

அப்பொழுது ஜைத்  (ரழி) அவர்கள் “என் அருமைத் தந்தையே! நான் விற்கவும், வாங்கவும் முடியாதபடி நபிகள் நாயகம் ﷺ அவர்களின் அடிமையாகி விட்டேன். மேலும், அவர்களின் மேன்மைக் குணங்கள், பெற்றோரின் அன்பையும், சொந்த வீட்டின் சுகத்தையும் மறக்கச் செய்துவிட்டன!” என உள்ளம் கனியக் கூறி, தனது தந்தையை திருப்பி அனுப்பி வைத்தார்.

நபிகள் நாயகம் ﷺ அவர்கள் அடிமையாக இருந்த ஜைத்  (ரழி) அவர்களை சுதந்திர மனிதனாக்கியதோடு மட்டுமில்லாமல், தம் சொந்த மாமி மகளான ஜைனப் பின்த் ஜஹ்ஷ் ரலியல்லாஹு அன்ஹா அவருக்குத் திருமணமும் செய்து வைத்தார்கள்.